Yr addysgu'n gryf mewn ysgol groesawgar, gyfeillgar a hapus

Cyhoeddodd tîm o Estyn eu hadroddiad ar yr ysgol yn Nynfant y tymor hwn. Dywedon nhw fod perthnasoedd cefnogol rhwng staff a disgyblion yn cyfrannu'n sylweddol at ymdeimlad cryf disgyblion o berthyn a'u hagweddau cadarnhaol at ddysgu.

Yn ôl yr adroddiad, "Mae cydweithio'n nodwedd arbennig o gryf o'r ysgol. Mae arweinwyr a staff yn rhannu ymagwedd tîm at sefydlu darpariaeth o ansawdd uchel ar gyfer pob disgybl ar draws y rhan fwyaf o agweddau ar waith yr ysgol. Er enghraifft, maent yn cydweithio'n dda i ddiwallu anghenion disgyblion ag ADY, gan sicrhau eu bod yn ffynnu fel aelodau gwerthfawr o gymuned yr ysgol."

Dywedodd arolygwyr fod y pennaeth, Rachel Lewis, wedi sefydlu gweledigaeth glir sy'n canolbwyntio ar ddiwallu anghenion unigol pob disgybl.

Mae'r adroddiad hefyd yn dweud, "Mae addysgu ar draws yr ysgol yn gryf ac mae staff wedi sefydlu cwricwlwm eang a chytbwys sy'n ennyn diddordeb disgyblion yn dda. Mae'r ysgol yn darparu cyfleoedd buddiol i ddisgyblion ehangu eu dychymyg a meddwl yn greadigol."

"Drwy'r holl ysgol, mae'r amrywiaeth o ddulliau addysgu diddorol a hwyliog a ddefnyddir i addysgu rhifedd yn arbennig o fuddiol. Mae hyn yn arwain at ddisgyblion yn datblygu sgiliau cryf yn y maes hwn. Mae'r rhan fwyaf o ddisgyblion yn datblygu eu sgiliau llythrennedd a digidol yn llwyddiannus. Mae'r ysgol yn hyrwyddo'r Gymraeg drwy wersi a gweithgareddau pwrpasol."

Mae cefnogaeth ar gyfer llais y disgybl yn gryf ar draws yr ysgol, ac mae perthynas waith gref hefyd â rhieni sy'n seiliedig ar ymddiriedaeth a pharch, gyda rhieni'n gefnogol iawn o'r ysgol.

Meddai Mrs Lewis, "Rwyf mor falch bod arolygwyr wedi cydnabod gwaith caled ein holl staff a disgyblion a'r gefnogaeth wych a gawn gan rieni a gofalwyr. Rwy'n gobeithio bod holl gymuned ein hysgol yr un mor falch â mi gyda'r cadarnhad hwn bod Pen-y-fro yn ysgol hapus a chyfeillgar lle caiff pawb ei werthfawrogi."

Meddai Aelod y Cabinet dros Addysg, Robert Smith, "Llongyfarchiadau i bawb ym Mhen-y-fro am adroddiad arolygu boddhaus."