Cyn-ddiffoddwr tân yn dechrau menter dronau newydd

Mae Keith, sy'n 59 oed, wedi lansio ei fusnes ffotograffiaeth a fideograffiaeth o'r awyr ei hun, Elite Drone Photography, sy'n tynnu lluniau a fideos syfrdanol o Abertawe a thu hwnt. 

Bu Keith, sydd o Townhill yn wreiddiol ac sydd bellach yn byw ym Mhontlliw, yn gwasanaethu yng ngorsafoedd tân Abertawe Ganolog, Castell-nedd a Sgeti cyn iddo ymddeol o'r gwasanaeth tân.

Gyda help gan Fusnes Cymru a grant dechrau busnes Cyngor Abertawe drwy Gronfa Ffyniant Gyffredin Llywodraeth y DU, roedd wedi gallu prynu dronau a chyfarpar cyfrifiadurol, ac ennill ei gymhwyster hedfan dronau mewn ysgol nos.

Er bod y cyfle i wneud ceisiadau i'r Gronfa Ffyniant Gyffredin ar gyfer y flwyddyn ariannol bresennol bellach wedi dod i ben, mae ffigurau'n dangos bod mwy na 200 o fusnesau yn Abertawe wedi elwa o arian grant drwy'r rhaglen dros y 12 mis diwethaf.

Mae eraill yn cynnwys Sauna Hut Gower a Macro Shack - siop gludfwyd ar Orchard Street sy'n arbenigo mewn prydau iachus sy'n addas i'r rheini sy'n mynd i'r gampfa.

Meddai Keith, tad i ddau sydd hefyd yn gweithio fel gofalwr rhan-amser yn Ysgol Gynradd Pontlliw, "Roedd dechrau busnes newydd yn frawychus, ond gwnaeth tîm cefnogi busnes Cyngor Abertawe fy helpu ar bob cam o'r ffordd.

"Byddwn i wrth fy modd yn arddangos mwy o Abertawe o'r awyr - mae'n lle gwych, ac rwy'n falch i'w alw'n gartref.

"Roedd dronau yn dechrau ymddangos yn y gwasanaeth tân tua'r amser roeddwn i'n ei adael, ond roeddwn i'n gallu gweld eu potensial. 

"Bob amser roeddwn i'n gwylio'r teledu, roedd dronau yn cael eu defnyddio i gynhyrchu lluniau a fideos ar gyfer y newyddion a rhaglenni dogfen. 

"Doeddwn i byth wedi dychmygu pan roeddwn i'n gweithio yn y gwasanaeth tân y byddai cyfryngau cymdeithasol yn dod yn rhan mor fawr o'm bywyd, ond mae'n rhaid i chi ddefnyddio llwyfannau fel TikTok ac Instagram i wella proffil eich busnes. Dyna'r ffordd newydd o ddod o hyd i fusnes."

Ers lansio'r busnes, mae Keith wedi cwblhau prosiectau drôn a fideo ar gyfer Ysgol Gynradd Pontlliw, Llys Nini, Canolfan Ganser Felindre, a The Social Butterfly Marketing.

Meddai'r Cynghorydd David Hopkins, Dirprwy Arweinydd ar y Cyd Cyngor Abertawe ac Aelod y Cabinet dros Gyflawni, "Mae stori Keith yn enghraifft wych o sut mae preswylwyr Abertawe'n defnyddio ein grantiau busnes i ddilyn diddordebau newydd a chreu mentrau lleol cyffrous. 

"Mae'n wych gweld rhywun a chanddo ddegawdau o brofiad yn y gwasanaethau cyhoeddus yn defnyddio'r un ymroddiad mewn maes newydd."

Ewch i www.abertawe.gov.uk/cyngorbusnes i gael gwybod am y cymorth y mae Cyngor Abertawe'n ei ddarparu i fusnesau yn y ddinas.