Dyluniadau'n cael eu datgelu ar gyfer rhagor o welliannau i chwaraeon olwynog yn Abertawe

Cyfleuster newydd sy'n canolbwyntio ar feiciau BMX yng nghanolfan chwaraeon yr Elba yng Nhregŵyr a pharc sglefrio wedi'i uwchraddio yn Ynystawe yw'r cynlluniau diweddaraf i'w datblygu fel rhan o fuddsoddiad gwerth £3m Cyngor Abertawe mewn chwaraeon olwynog ar draws y ddinas.

Rhannwyd y dyluniadau - a ddatblygwyd gan gwmni arbenigol Curve Studio yn dilyn ymgynghoriad helaeth - mewn cyfarfod diweddar â phreswylwyr lleol a'r rheini sy'n cymryd rhan mewn chwaraeon olwynog.

Mae cynllunio a chaffael ar gyfer y ddau brosiect wedi'u trefnu ar gyfer dechrau 2026 a disgwylir i'r gwaith adeiladu ddechrau'r haf nesaf.

Mae'r prosiectau hyn yn rhan o raglen ehangach a fydd yn golygu nad yw'r rhan fwyaf o breswylwyr Abertawe'n fwy na dwy filltir o safle chwaraeon olwynog newydd neu wedi'i uwchraddio.

Meddai'r Cynghorydd Andrew Stevens, Aelod Cabinet Cyngor Abertawe dros yr Amgylchedd ac Isadeiledd, "Mae sglefrfyrddio, beicio BMX a chwaraeon olwynog eraill yn hynod boblogaidd yn Abertawe, ac mae'r dyluniadau newydd hyn ar gyfer Tregŵyr ac Ynystawe'n dangos y cynnydd parhaus rydym yn ei wneud ar draws y ddinas.

"Mae ein buddsoddiad gwerth £2.8m yn darparu cyfleusterau o ansawdd uchel a luniwyd gan ymgynghoriad lleol, gan sicrhau eu bod yn adlewyrchu'r hyn y mae defnyddwyr eu hunain wedi dweud wrthym eu bod am ei gael mewn lleoedd chwaraeon olwynog modern.

"Mae hyn yn ymwneud â mwy na rampiau newydd neu arwynebau wedi'u hailwampio - mae'n ymwneud â chreu lleoedd diogel, ysbrydoledig sy'n helpu pobl ifanc i aros yn heini, magu hyder a chysylltu â'u cymunedau.

"Gydag arbenigedd Curve Studio a'r brwdfrydedd rydym wedi'i weld gan breswylwyr lleol, bydd y prosiectau hyn yn gwneud gwahaniaeth go iawn. Rydym wedi ymrwymo i roi'r wybodaeth ddiweddaraf i bobl wrth i'r cynlluniau wneud cynnydd ac annog pawb i barhau i ymwneud â'r prosiectau wrth i'r camau nesaf gael eu datblygu."

Disgwylir i waith ddechrau'n fuan ar gyfleuster chwaraeon olwynog newydd tebyg i sgwâr stryd ym Mharc Fictoria.

Dyfernir contractau pellach cyn bo hir ar gyfer gwelliannau ym Mynydd Newydd ym Mhen-lan a Chanolfan Phoenix yn Townhill, gan ychwanegu at y gwaith gwella yng Nghoed Bach ym Mhontarddulais a Melin Mynach yng Ngorseinon.

Bwriedir creu cyfleuster beicio bach ym Mlaen-y-maes, ynghyd â thrac pwmpio newydd yn Llandeilo Ferwallt, adnewyddu'r trac presennol yn Nyffryn Clun, a gosod trac pwmpio iau newydd yng Ngorseinon.

Caiff safleoedd ychwanegol a fydd yn elwa o'r rhaglen eu cyhoeddi hefyd cyn bo hir.

Cefnogir y buddsoddiad gan gyfraniadau aelodau'r ward, y gronfa buddsoddi cymunedol, cynghorau cymuned a thref a Llywodraeth Cymru drwy gyllid Teithio Llesol.