Eich lle, eich gwasanaethau: Y Storfa'n agor ddydd Llun

Mae'r hwb gwasanaethau cymunedol blaenllaw hwn, a gyflwynir gan y cyngor, yn hen adeilad BHS ar Stryd Rhydychen.

Bydd llawer o'r gwasanaethau sy'n cael eu cynnig yno ar gael ar y diwrnod cyntaf; caiff eraill eu hychwanegu wrth i staff ac ymwelwyr ymgyfarwyddo â threfnau arferol newydd.

Y Storfa yw conglfaen rhaglen adfywio gwerth £1bn y cyngor - a bydd yn helpu i gynyddu nifer y bobl sy'n ymweld â chanol y ddinas.

Bwriedir iddo drawsnewid sut mae preswylwyr yn cael mynediad at wasanaethau hanfodol.

Mae'r Storfa'n dod ag amrywiaeth eang o wasanaethau ynghyd o dan yr unto, gan greu amgylchedd modern, croesawgar.

Mae'n agos i gannoedd o leoedd parcio ceir - gan gynnwys cilfachau i'r rheini â phroblemau symudedd, ac i lwybrau ac arosfannau cludiant cyhoeddus.

Meddai Arweinydd Cyngor Abertawe, Rob Stewart,"Bydd y cyfleuster newydd gwych hwn yn helpu i wneud canol y ddinas yn lle gwell fyth i ymweld ag ef.

"Bydd Y Storfa yn fan lle gall pobl ddod at ei gilydd - i ddysgu, cael mynediad at wasanaethau pwysig neu gymryd rhan mewn bywyd cymunedol mewn lle modern a chroesawgar.

"Drwy ddod â gwasanaethau fel y llyfrgell ganolog, yr archifau sirol, Opsiynau Tai ac eraill at ei gilydd o dan yr un to, bydd yn gwneud bywyd yn haws i lawer o breswylwyr ac yn creu cyfleoedd i bobl o bob oedran.

"Bydd yn cyfuno â llawer o gynlluniau eraill yng nghanol y ddinas i helpu i gynyddu nifer yr ymwelwyr a chreu'r gwariant sydd ei angen i ddenu mwy o siopau a busnesau eraill.

"Mae bod yng nghanol canol y ddinas yn golygu ei fod yn agos i fannau parcio a bysus."

Caiff ei agor yn gyhoeddus am 9am ddydd Llun, ac yno bydd ymwelwyr cael hyd i Lyfrgell Ganolog newydd y ddinas.Bydd gwasanaethau llyfrgell ar gael saith niwrnod yr wythnos, gyda system hunanwasanaeth arloesol ar waith bob dydd Llun o 8 Rhagfyr.

Hefyd, darperir gwasanaethau Opsiynau Tai a Chymorth Tai y cyngor yn yr adeilad, yn ogystal â Gwasanaeth Archifau Gorllewin Morgannwg a nifer o wasanaethau eraill y cyngor.

Bydd gwasanaethau Gyrfa Cymru a Chyngor ar Bopeth Abertawe a Chastell-nedd Port Talbot ar gael yno - a bydd gwasanaethau eraill fel Llyfrgell Glowyr De Cymru Prifysgol Abertawe hefyd i'w cael yn Y Storfa.

Mae arianwyr Y Storfa'n cynnwys rhaglen Trawsnewid Trefi Llywodraeth Cymru. Arweiniwyd y gwaith adeiladu gan The Kier Group.