Cyngor Abertawe'n ennill Gwobr Genedlaethol ar gyfer Gorymdaith y Nadolig

Roedd y seremoni wobrwyo, a gynhaliwyd yn y baddonau Rhufeinig a The Pump Room yng Nghaerfaddon nos Fercher 26 Tachwedd, yn dathlu'r digwyddiadau gorau yn niwydiant digwyddiadau awyr agored y DU, gan ddod â gweithwyr proffesiynol arweiniol y diwydiant o bob rhan o'r wlad at ei gilydd. Mae'r wobr hon yn gyflawniad arwyddocaol i Gyngor Abertawe, gan gydnabod creadigrwydd, ymroddiad a dylanwad yr holl dimau sy'n dod at ei gilydd i wneud yr orymdaith Nadolig flynyddol yn bosib.   

Meddai Arweinydd y Cyngor, Rob Stewart,

"Mae ennill y wobr hon yn llwyddiant ysgubol ar gyfer Abertawe a gallu'r ddinas i ddarparu profiadau diwylliannol o safon sy'n uno cymunedau ac yn denu ymwelwyr o bob cwr.

"Mae Gorymdaith y Nadolig yn llawer mwy na sioe ysblennydd, mae'n draddodiad sy'n dod â phobl at ei gilydd, yn cefnogi busnesau lleol, ac yn creu eiliadau a rennir sy'n cryfhau ein hymdeimlad o gymuned. Mae'r digwyddiadau hyn yn ymwneud â balchder, perthyn a llawenydd, ac mae cydnabod hyn ar lwyfan genedlaethol yn rhywbeth y gall y ddinas gyfan ei ddathlu a bod yn falch ohono.

"Dyma'r ail dro eleni y mae digwyddiadau Abertawe wedi cael cydnabyddiaeth ar lefel genedlaethol yn dilyn ein llwyddiant yn cyrraedd y rownd derfynol yng Ngwobrau Twristiaeth Croeso Cymru yn gynharach eleni. Mae'r cyflawniadau hyn yn dilyn buddugoliaethau niferus ar lefel leol a rhanbarthol, gan atgyfnerthu enw da Abertawe fel cyrchfan blaenllaw ar gyfer digwyddiadau bywiog a chynhwysol o safon uchel."

Wrth fyfyrio ar y noson, dywedodd Susan Tanner, Prif Swyddog Gweithredol NOEA, "Mae gorffen blwyddyn ein pen-blwydd yn 45 oed gyda'r nifer uchaf erioed o ymgeiswyr a'r gynulleidfa fwyaf erioed yn gyflawniad rhyfeddol i'n cymuned. Mae safon enillwyr eleni'n dangos yr arloesedd, y brwdfrydedd a'r doniau sy'n parhau i ddylanwadu ar ddiwydiant adloniant awyr agored y DU. Mae heno wir wedi'n hatgoffa o ba mor bell rydym wedi dod a pha mor ddisglair yw'r ffordd ymlaen.

"Daeth Cyngor Abertawe i'r brig yng nghategori Digwyddiad y Flwyddyn - Sector Awdurdodau Lleol oherwydd ei ymagwedd flaengar at gyflwyno dathliadau cyhoeddus mawr."

Gan adeiladu ar y momentwm hwn, mae Cyngor Abertawe'n paratoi llu o ddigwyddiadau cyffrous ar gyfer 2026, gan ddechrau gyda'r Ŵyl Croeso ar benwythnos Dydd Gŵyl Dewi, a bydd yn cynnig hyd yn oed mwy o gyfleoedd i breswylwyr ac ymwelwyr ddod at ei gilydd i Joio Bae Abertawe, y Mwmbwls a Gŵyr.

I weld y digwyddiadau sydd i ddod, ewch i: www.croesobaeabertawe.com