Cynllun Datblygu Lleol 2 - Arfarniad Cynaladwyedd Integredig a'r Asesiad Rheoliadau Cynefinoedd

Mae gofyniad statudol i Gynlluniau Datblygu Lleol (CDLlau) fod yn destun Arfarniad Cynaladwyedd (AC). Dylai'r Arfarniad Cynaladwyedd ymgorffori gofynion y Rheoliadau Arfarniad Cynaladwyedd Strategol (ACS); asesiad o'r CDLl2 newydd ar yr iaith Gymraeg; ac Asesiad Effaith Iechyd. Felly, fe'i hadwaenir yn gyffredin fel Arfarniad Cynaladwyedd Integredig (ACI). 

Rôl yr ACI yw asesu'r ffordd y bydd polisïau a chynigion datblygol y CDLl2 yn helpu i gyflawni'r amcanion amgylcheddol, economaidd, cymdeithasol a diwylliannol ehangach. 

Arfarniad Cynaladwyedd Integredig (ACI) o'r Cynllun Cyn Adneuo - Strategaeth a Ffefrir

Mae'r adroddiad ACI o'r Cynllun Cyn Adneuo - Strategaeth a Ffefrir - yn cynnwys asesiad o Weledigaeth, Amcanion a'r opsiynau ar gyfer yr opsiynau twf strategol a dulliau gofodol. Mae'n darparu asesiad a rhesymu ar gyfer y Strategaeth Creu Lleoedd a ddewiswyd a'r polisïau strategol a nodwyd. Mae'r adroddiad yn ymgorffori Asesiad o'r Effaith ar yr Iaith Gymraeg, Asesiad Effaith Cydraddoldeb ac ystyriaeth o Asesiad o'r Effaith ar Iechyd ac mae ar gael yn y porth ymgynghori. Mae crynodeb annhechnegol (PDF, 2 MB) o'r ACI ar gael hefyd.

Adroddiad Cwmpasu'r Arfarniad Cynaladwyedd 

Cam cyntaf yr ACI yw'r cam 'cwmpasu'. Mae'n gam casglu tystiolaeth, pan adolygir cynlluniau, rhaglenni, strategaethau a pholisïau sy'n berthnasol i baratoi'r CDLl2 er mwyn nodi sylfaen dystiolaeth o les economaidd, cymdeithasol, amgylcheddol, iechyd a diwylliannol presennol y sir. Cyflwynir materion arwyddocaol yn yr ardal sy'n berthnasol i'r system cynllunio defnydd tir. Mae'r Adroddiad Cwmpasu (PDF, 1 MB) terfynol hefyd yn cynnwys y Fframwaith ACI. Mae yn cynnwys amcanion/meini prawf sy'n cael eu defnyddio wrth asesu strategaeth, polisïau a chynigion CDLl2.

Asesiad Rheoliadau Cynefinoedd (ARhC) o'r Cynllun Cyn Adneuo - Strategaeth a Ffefrir

Mae Rheoliadau Cadwraeth Cynefinoedd a Rhywogaethau 2017 (Cymru a Lloegr) fel y'u diwygiwyd gan Reoliadau Cadwraeth Cynefinoedd a Rhywogaethau (Diwygio) (Ymadael â'r UE) 2019 yn nodi'r angen i'r cyngor gynnal Asesiad Rheoliadau Cynefinoedd (ARhC) (gan gynnwys Asesiad Priodol os oes angen) o'r Cynllun Datblygu Lleol Newydd (CDLl2). 

Pwrpas yr ARhC yw canfod a fydd y CDLl2 yn cael unrhyw effeithiau andwyol sylweddol ar gyfanrwydd safleoedd bywyd gwyllt o bwys rhyngwladol sy'n rhan o Rwydwaith Safleoedd Cenedlaethol y DU, yn benodol Ardaloedd Cadwraeth Arbennig (ACAau) ac Ardaloedd Gwarchodaeth Arbennig (AGAau) (y'u hadwaenid yn flaenorol fel safleoedd Naura 200), ac, fel mater o bolisi'r Llywodraeth, safleoedd Ramsar, naill ai ar wahân, neu ar y cyd â chynlluniau a phrosiectau eraill, ac i roi cyngor ar fecanweithiau polisi priodol ar gyfer darparu mesurau lliniaru lle caiff effeithiau o'r fath eu nodi.

Cyhoeddir Asesiad Sgrinio Rheoliadau Cynefinoedd ar y Cynllun Cyn Adneuo (Strategaeth a Ffefrir) fel rhan o'r broses ymgynghori ac mae ar gael yn y porth ymgynghori. Mae crynodeb annhechnegol (PDF, 158 KB) o'r ddogfen ar gael hefyd.