Y cyngor yn datblygu cynllun i gadw glan môr y Mwmbwls ar ei newydd wedd yn lân ac yn groesawgar

Ers i'r prom ailagor yn swyddogol ym mis Gorffennaf, mae timau glanhau wedi bod yn ymweld yn rheolaidd i gynnal yr ardal.

Nawr, yn dilyn adborth gan y cyhoedd, mae'r cyngor yn gwella'i ymagwedd i sicrhau bod y prom yn aros yn y cyflwr gorau posib.

Meddai Cyril Anderson, Aelod Cabinet y cyngor, "Mae'n bwysig ein bod yn cadw'r ardal yn ddiogel ac yn ddeniadol i bawb.

"Mae cerrig o'r ardaloedd plannu hardd ar y prom wedi gollwng ar y rhodfa'i hun.

"Mae staenio mewn ardaloedd fel o dan y meinciau newydd; mae pobl yn gollwng diodydd, bwyd a chynhyrchion eraill.

"Mae gwaith glanhau ychwanegol wedi'i wneud, yn benodol yn yr ardaloedd hynny - ac mae'r canlyniadau wedi bod yn galonogol."

Aeth tîm glanhau'r cyngor ati i dargedu'r ardaloedd o amgylch y morglawdd a'r ardaloedd eistedd newydd.

Y nod oedd cael gwared ar staeniau diodydd a halogyddion arwyneb eraill i gynnal apêl weledol a hylendid y prom.

Defnyddiwyd peiriannau brwshys mecanyddol gydag atodion arbenigol newydd yn ystod y gwaith glanhau, a fu'n effeithiol iawn wrth gael gwared ar staeniau anodd eu trin.

Er y nifer mawr o gerddwyr a beicwyr, gwnaed y gwaith yn ddidrafferth ac yn effeithlon.

Roedd adborth y cyhoedd yn gadarnhaol, gyda llawer yn dweud bod y prom yn edrych yn well ac yn teimlo'n fwy croesawgar

Meddai Arweinydd y Cyngor, Rob Stewart, "Mae ein tîm wedi gorffen y gwaith pistyllio ac rydym nawr yn llunio cynllun gwaith i gadw'r prom mor lân â phosib.

"Byddwn yn parhau i fonitro'r ardal ac yn cynnwys gweithrediadau tebyg yn ein rhaglen lanhau barhaus."

Ailagorodd y prom yn llawn eleni ar ôl prosiect gwerth miliynau o bunnoedd a gryfhaodd yr amddiffynfeydd môr. Byddant yn amddiffyn y gymuned rhag stormydd ac effeithiau newid yn yr hinsawdd am ddegawdau i ddod.

Roedd y prosiect yn cynnwys gwaith i wella golwg a naws y prom, gan ei wneud yn fwy deniadol i bobl leol ac ymwelwyr.

Llun: Aelod o dîm glanhau Cyngor Abertawe yn mynd i'r afael â staeniau ar brom y Mwmbwls. Llun: Cyngor Abertawe