Gwaith wedi'i gwblhau ym mharc sglefrio cymdogaeth Coed Bach

Mae'r cyfleuster newydd yn rhan o ymrwymiad Cyngor Abertawe i fuddsoddi £2.8m mewn parciau sglefrio mewn cymdogaethau ar draws y ddinas drwy weithio mewn partneriaeth agos â chymunedau lleol a chwmni dylunio arbenigol o'r enw Curve Studio.

Mae'r cyfleuster concrit newydd ym Mharc Coed Bach sy'n goch, gwyrdd a llwyd yn disodli hen ramp metel a oedd yn y parc yn flaenorol.

Mae gwaith hefyd wedi dechrau i wneud gwelliannau i'r parc sglefrio presennol ym Melin Mynach yng Ngorseinon. Bydd hyn yn cynnwys adeiladu llwybr pwmpio newydd i feicwyr BMX dibrofiad ac iau.

Mae cynlluniau'r cyngor yn golygu na fydd yn rhaid i'r rhan fwyaf o bobl deithio mwy na dwy filltir i gyrraedd parc sglefrfyrddio neu gyfleuster chwaraeon olwynog a ailddatblygwyd unwaith y bydd y buddsoddiad wedi'i gwblhau.

Meddai'r Cyng. Robert Francis-Davies, Aelod Cabinet Cyngor Abertawe dros Fuddsoddi, Adfywio a Thwristiaeth, "Mae sglefrfyrddio, beicio BMX a chwaraeon olwynog eraill yn boblogaidd iawn yn Abertawe, ond mae nifer o'n pobl ifanc wedi gorfod defnyddio cyfleusterau o safon mewn mannau eraill er mwyn dilyn eu diddordebau yn ddiweddar oherwydd nad oedd safon y cyfleusterau yma yn ddigon da.

"Dyma pam rydym yn buddsoddi bron £3m mewn parciau sglefrio mewn cymdogaethau ar draws y ddinas oherwydd bydd yn helpu i ateb y galw wrth hefyd godi proffil Abertawe fel un o gyrchfannau gorau'r DU ar gyfer chwaraeon olwynog."

Mae safleoedd eraill a gyhoeddwyd eisoes ar gyfer gwelliannau i barciau sglefrio mewn cymdogaethau yn cynnwys Parc Fictoria, Mynydd Newydd ym Mhen-lan a Chanolfan y Ffenics yn Townhill. Bydd y llwybr pwmpio presennol yn Nyffryn Clun hefyd yn cael ei ailwampio. 

Bydd manylion ynghylch pryd y bydd y gwaith gwella yn dechrau ar y safleoedd hynny - yn ogystal â gwybodaeth am safleoedd eraill a fydd yn elwa - yn cael eu cyhoeddi yn y man.