Parc sglefrio wedi'i uwchraddio bellach ar agor yng Ngorseinon

Mae rampiau, llethrau a chwarter pibell yn rhan o'r cyfleuster wedi'i uwchraddio, sy'n rhan o fuddsoddiad o £2.8m gan  Gyngor Abertawe mewn chwaraeon olwynog ar draws y ddinas.

Mae'r gwaith hwn yn dilyn cyflwyno parc sglefrio mewn cymdogaeth gwell ym Mharc Coed Bach ym Mhontarddulais ychydig o fisoedd yn ôl.

Bydd llawer o safleoedd chwaraeon olwynog eraill ar draws Abertawe hefyd yn elwa o welliannau.

Gan weithio'n agos gydag arbenigwyr yn Curve Studio, mae'r cynlluniau'n golygu na fydd yn rhaid i'r rhan fwyaf o bobl deithio mwy na dwy filltir i ddod o hyd i gyfleuster sglefrfyrddio neu chwaraeon olwynog wedi'i ailddatblygu ar ôl i'r buddsoddiad gael ei gwblhau.

Meddai'r Cyng. Robert Francis-Davies, Aelod Cabinet Cyngor Abertawe dros Fuddsoddi, Adfywio a Thwristiaeth, "Mae'n braf gweld bod y parciau sglefrio gwell ym Melin Mynach a Choed Bach bellach yn cael eu defnyddio, wrth i ni barhau i gyflwyno cyfleusterau chwaraeon olwynog yn Abertawe y mae selogion yn eu haeddu.

"Bydd rhagor o welliannau o'r math hwn i ddilyn dros y misoedd a'r flwyddyn nesaf fel rhan o'n hymrwymiad i wneud Abertawe'n un o'r dinasoedd gorau yn y DU ar gyfer sglefrfyrddio, reidio beiciau BMX a chwaraeon olwynog eraill.

"Mae hyn yn dilyn buddsoddiad o £8m gan y cyngor i wella lleoedd parcio ar draws Abertawe er mwyn rhoi hwb i filoedd o blant a theuluoedd."

Mae safleoedd eraill sydd eisoes wedi'u cyhoeddi ar gyfer gwelliannau i'w parciau sglefrio'n cynnwys sgwâr sglefrio ym Mharc Victoria a pharciau sglefrio mewn cymdogaethau ym Mynydd Newydd ym Mhen-lan a Chanolfan y Ffenics yn Townhill. Mae cynlluniau hefyd ar gyfer trac pwmpio newydd i feicwyr BMX newydd ac iau ym Melin Mynach, tra bydd y trac pwmpio presennol yn Nyffryn Clun yn cael ei adnewyddu.

Bydd manylion ynghylch pryd y bydd y gwaith gwella yn dechrau ar y safleoedd hynny - yn ogystal â gwybodaeth am safleoedd eraill a fydd yn elwa - yn cael eu cyhoeddi yn y man.

Mae'r buddsoddiad cyffredinol yn cynnwys cyllid gan aelodau ward, y gronfa buddsoddi cymunedol, a chynghorau cymuned a thref. Mae hefyd yn cynnwys grant teithio llesol, diolch i gyllid gan Lywodraeth Cymru gyda chefnogaeth gan Drafnidiaeth Cymru.