Cryfach gyda'n gilydd - sut mae gwasanaethau cyhoeddus yn bwriadu trawsnewid bywydau am byth

Mae camau gweithredu i roi'r dechrau gorau mewn bywyd i blant lleol, gwarchod a gwella ein hamgylchedd naturiol rhyfeddol a chryfhau cysylltiadau yn ein cymuned i gyd yn helpu Abertawe i ddod yn lle gwych i fyw.

Mae Bwrdd Gwasanaethau Cyhoeddus Abertawe wedi dod â chynrychiolwyr o bob rhan o'r ddinas ynghyd i ddathlu cyflawniadau y rhoddwyd sylw iddynt yn adroddiad blynyddol y Bwrdd a'i gynllun gweithredu sy'n pennu cam nesaf y gwaith i wella bywyd preswylwyr.

Roedd Fforwm Partneriaeth Bwrdd Gwasanaethau Cyhoeddus Abertawe, a gynhaliwyd yn stadiwm Swansea.com ac a gadeiriwyd gan Ddirprwy Arweinydd ar y cyd y cyngor Andrea Lewis, wedi croesawu partneriaid o'r adran iechyd, y gwasanaethau brys, addysg, elusennau a grwpiau cymunedol i fyfyrio ar gynnydd a chryfhau cydweithio.

Roedd y digwyddiad yn arddangos sut y mae cydweithio yn helpu i wneud Abertawe'n lle tecach, gwyrddach, iachach a mwy diogel i fyw.

Mae'r adroddiad blynyddol diweddaraf ar gyfer 2024-25 yn tynnu sylw at gyflawniadau allweddol gan gynnwys ehangu'r rhaglen Dechrau'n Deg, gwreiddio hawliau dynol mewn gwasanaethau cyhoeddus, datblygu strategaeth addasu i'r hinsawdd, a gwella diogelwch cymunedol drwy hyrwyddo cydweithrediad rhwng gwasanaethau.

Roedd y cyflawniadau y rhoddwyd sylw iddynt yn yr adroddiad yn cynnwys:

• Gostyngiad o 20% yn allyriadau carbon y sector cyhoeddus, sy'n fwy na'r amcanestyniad gwreiddiol.
• Ehangodd gwasanaethau Dechrau'n Deg i ardaloedd sydd wedi'u tangynrychioli, a gwellodd atgyfeiriadau Ymwelwyr Iechyd, gan alluogi cymorth cynharach i deuluoedd.
• Lansiwyd rhwydwaith Abertawe Greadigol, sy'n dod â sectorau diwylliannol ynghyd i hybu ymgysylltiad lleol, yr economi a lles.

Roedd y fforwm hefyd wedi nodi lansiad Cynllun Gweithredu diweddaredig y Bwrdd Gwasanaethau Cyhoeddus ar gyfer 2025-26, sy'n nodi camau ymarferol ar gyfer blwyddyn olaf y Cynllun Llesiant presennol. Mae'r cynllun yn canolbwyntio ar bum maes blaenoriaeth: Y blynyddoedd cynnar, hawliau dynol, newid yn yr hinsawdd ac adferiad natur, cymunedau cryf a'r cynnig diwylliannol.

Mae'r Bwrdd Gwasanaethau Cyhoeddus yn bartneriaeth o sefydliadau gwasanaethau cyhoeddus gan gynnwys Cyngor Abertawe, Bwrdd Iechyd Prifysgol Bae Abertawe, Cyfoeth Naturiol Cymru a Gwasanaeth Tân ac Achub Canolbarth a Gorllewin Cymru. Fe'i sefydlwyd o dan Ddeddf Llesiant Cenedlaethau'r Dyfodol i helpu cyrff cyhoeddus i weithio'n well gyda'i gilydd a chyda chymunedau.