Sêr lleol ym maes twristiaeth yn helpu i ddenu dros filiwn o bobl i wylio'n fideos

Mae arwyr lleol fel Anthony Williams o Plantasia, atyniad yng nghanol y ddinas a Bethan Matthews o The Lighthouse Bar & Kitchen yn y Mwmbwls yn ymddangos mewn ffilmiau byr i hyrwyddo'r ardal.

Mae eraill sydd wedi cymryd rhan yn y fideos, a gomisiynwyd gan dîm twristiaeth y Cyngor, yn cynnwys Sian ac Andrew Brookes o Gower Gin.

Maent i gyd yn esbonio pam maent yn dwlu ar fyw a gweithio yn eu "lle hapus" - Bae Abertawe, y Mwmbwls a Gŵyr.

Mae'r Cyngor hefyd wedi cynhyrchu amrywiaeth o fideos Llwybrau Bae Abertawe, sy'n hyrwyddo celf a diwylliant, treftadaeth, bwyd a diod, lles a chwaraeon dŵr yr ardal.

Mae busnesau twristiaeth sy'n rhan o'r fideos yn cynnwys atyniadau, bwytai, cyflenwyr llety, darparwyr gwasanaethau a lleoliadau adloniant.

Y llynedd, gwyliwyd y fideos gan dros filiwn o ddefnyddwyr cyfryngau cymdeithasol, a helpodd i hybu gwerth y sector yn lleol i dros £500 miliwn. 

Meddai Aelod Cabinet y Cyngor,Robert Francis-Davies,"Mae pobl Abertawe yn dwlu ar roi croeso cynnes i ymwelwyr - dyna pam roeddem yn awyddus i'w cynnwys yn rhai o'n fideos hyrwyddol. Diolch yn fawr iawn i'n holl bartneriaid sydd wedi gweithio gyda ni ar y ffilmiau hyn!"

Y 10 ffilm twristiaeth fwyaf poblogaidd ar gyfer y Cyngor yn 2023 oedd:

• Llwybrau yn Abertawe a Gŵyr- 31,264 o bobl wedi'i gwylio ar YouTube
• Joio Canol y Ddinas - 26,943
• Gwyliau sy'n Addas i Gŵn - 23,344
• Porth Einon -19,158
• Llwybrau ar gyfer lles yn ystod y gaeaf, gan gynnwys Amgueddfa Abertawe - 17,064
• Llwybr Arfordir Gŵyr- 16,858
• Canol y Ddinas a'r Bae - 14,392
• Cerdded, gan gynnwys Rhosili a gogledd Gŵyr - 12,621
• Traethau, gan gynnwys y Tri Chlogwyn ac Oxwich - 10,033
• Joio bwyd a diod yn y ddinas ac ar hyd yr arfordir  - 9,119

Mae ymgyrch Llwybrau Bae Abertawe'r ddinas yn parhau ac mae'r tîm twristiaeth yn parhau â'i ymgyrch Lle Hapus.

Llun: Un o sêr y fideos twristiaeth, Bethan Matthews o The Lighthouse Bar & Kitchen yn y Mwmbwls.