Ar agor! Y Storfa, hwb gwasanaethau cyhoeddus newydd yng nghanol dinas Abertawe

Mae'r hwb gwasanaethau cymunedol blaenllaw hwn, a gyflwynir i chi gan Gyngor Abertawe, yn hen adeilad BHS ar Stryd Rhydychen.

Y Storfa yw conglfaen rhaglen adfywio gwerth £1bn y cyngor, a bydd yn helpu i gynyddu nifer y bobl sy'n ymweld â chanol y ddinas. 

Bwriedir i'r hwb drawsnewid sut mae preswylwyr yn cael mynediad at wasanaethau hanfodol yng nghanol y ddinas.

Mae'r Storfa'n dod ag amrywiaeth eang o wasanaethau ynghyd o dan yr unto, gan greu amgylchedd modern a chroesawgar.

Mae'n agos i gannoedd o leoedd parcio ceir - gan gynnwys cilfachau i'r rheini â phroblemau symudedd, ac i lwybrau ac arosfannau cludiant cyhoeddus. 

Roedd llawer o'r gwasanaethau sy'n cael eu cynnig yno ar gael ar y diwrnod cyntaf; caiff eraill eu hychwanegu wrth i staff ac ymwelwyr ymgyfarwyddo â threfnau arferol newydd.

Meddai Arweinydd y Cyngor, Rob Stewart, "Mae'r Storfa yn lle gwych yng nghanol y ddinas i bobl Abertawe gael mynediad at y gwasanaethau y maen nhw'n eu defnyddio o ddydd i ddydd.

"Yn ogystal â gwelliannau eraill yn ein rhaglen adfywio gwerth £1bn, bydd yn gwneud canol y ddinas yn lle gwell fyth i ymweld ag ef.

"Gall pobl ddod ynghyd yma i gymryd rhan mewn bywyd cymunedol mewn lleoliad modern a chroesawgar."

Gall ymwelwyr ddod o hyd i Lyfrgell Ganolog y ddinas yn Y Storfa, yn ogystal â gwasanaethau Opsiynau Tai a Chymorth Tai'r cyngor, Gwasanaeth Archifau Gorllewin Morgannwg a nifer o wasanaethau eraill y cyngor.

Mae gwasanaethau Gyrfa Cymru a Chyngor ar Bopeth Abertawe a Chastell-nedd Port Talbot ar gael yno, yn ogystal â gwasanaethau eraill fel Llyfrgell Glowyr De Cymru Prifysgol Abertawe.

Meddai Ian Rees, cyfarwyddwr rhanbarthol Kier Construction Western & Wales, "Rydym yn hynod falch o weld Y Storfa yn agor ei drysau i'r cyhoedd, gan ddarparu lle cymunedol hanfodol yng nghanol y ddinas sydd wedi'i gyflwyno i'r safonau uchaf a pharhau â pherthynas gref Kier â Chyngor Abertawe."

Mae arianwyr Y Storfa'n cynnwys rhaglen Trawsnewid Trefi Llywodraeth Cymru. Gwnaed y gwaith adeiladu dan arweiniad Kier.

I gael rhagor o wybodaeth am Y Storfa, ewch i: www.bit.ly/YStorfa2025