Cyflwyno cyfleusterau talu â cherdyn ym mhob tacsi trwyddedig yn Abertawe

Ar hyn o bryd, mae llawer o dacsis yn derbyn taliadau am deithiau drwy arian parod yn unig, gan ei gwneud yn anodd i bobl deithio os nad ydynt yn cario arian parod.

O fis Rhagfyr 2025, mae rheolau newydd a gymeradwywyd gan Bwyllgor Trwyddedu Cyffredinol Cyngor Abertawe yn golygu bod yn rhaid i dacsis hurio preifat a cherbydau hacni newydd eu trwyddedu gynnig cyfleusterau talu â cherdyn.

Daw'r rheolau newydd i rym ar gyfer deiliaid trwyddedau tacsi presennol pan gaiff eu trwydded eu hadnewyddu. Felly, ni fydd yn rhaid i rai ohonynt gydymffurfio â'r newidiadau tan y flwyddyn nesaf.

Mae'r cynlluniau talu â cherdyn yn dilyn adroddiad a gyhoeddwyd ym mis Ionawr 2025, a gymeradwyodd ymgynghoriad cyhoeddus i glywed gan weithredwyr tacsis ac aelodau'r cyhoedd, gan ofyn iddynt a ddylai cyfleusterau talu â cherdyn fod yn orfodol ym mhob tacsi.

Mae'r cynlluniau hyn yn dilyn pryderon a fynegwyd gan y cyhoedd fod teithwyr mewn perygl o gael eu gadael yn ddiymgeledd gan nad ydynt yn cario arian parod a chan eu bod yn dibynnu'n fwyfwy ar ddulliau talu modern fel Google Pay a thaliadau digyffwrdd.

Cynhaliwyd ymgynghoriad ym mis Mai a mis Mehefin eleni a chytunodd 82% o'r rhai hynny a gymerodd ran y dylai pob tacsi gynnig peiriant talu â cherdyn.

At ei gilydd, cymerodd 417 o bobl ran yn yr ymgynghoriad, gan gynnwys 179 o'r diwydiant tacsis.

Meddai'r Cyng. Andrew Williams, Aelod y Cabinet dros Wasanaethau Corfforaethol, "Mae llawer o gwmnïau tacsis a pherchnogion tacsis unigol eisoes yn defnyddio technoleg darllen cardiau yn ogystal â chaniatáu i deithwyr dalu am deithiau drwy ap ffôn clyfar.

"Fodd bynnag, mae llawer o yrwyr tacsis yn y ddinas yn dal i ganiatáu taliadau drwy arian parod yn unig, a gallai hyn olygu na fyddai modd i deithwyr dalu am eu taith os nad ydynt yn cario arian parod.

"Mae ein hymgynghoriad cyhoeddus diweddar wedi dangos bod y mwyafrif helaeth o deithwyr am weld dulliau talu modern yn cael eu mabwysiadu ym mhob tacsi trwyddedig sy'n gweithredu yn y ddinas."

​

​

​

​