Rhodfa Bywyd Gwyllt Hillside gan gynnwys Chwarel Rosehill

Mae Rhodfa Bywyd Gwyllt Hillside yn ardal eang naturiol agored (27 hectar), tua milltir o ganol dinas Abertawe.

Wedi'i gosod rhwng ardaloedd Townhill, Mayhill a Mount Pleasant, mae'n ofod awyr agored gwerthfawr sydd hefyd yn cynnal amrywiaeth syfrdanol o fywyd gwyllt. Mae hefyd o gryn werth addysgol, gyda'i golygfeydd eang o Fae Abertawe a'i hanes cyfoethog ac amrywiol.

Mae'r safle'n cynnwys amrywiaeth eang o gynefinoedd gan gynnwys coetir, rhostir, prysgwydd a gwlypdir. Cewch weld cadnoid a bysedd y cŵn, rhedynen gyfrdwy ac iâr fach yr haf y fantell goch yn ogystal â therfynau hen gaeau a chloddiau sy'n dyddio o gyfnod y Ddeddf Cau Tir Comin yn y 18fed ganrif.

Mae llawer o welliannau wedi'u gwneud gan grwpiau cymunedol lleol, Canolfan Hyfforddiant Dinas Abertawe, gwirfoddolwyr ac ysgolion gyda chymorth Dinas a Sir Abertawe.

Chwarel Rosehill

Yn wreiddiol, dechreuwyd chwarela yma yn yr 1840au, gan ddarparu llawer o'r garreg adeiladu at ddefnydd lleol. Ar ôl blynyddoedd o esgeulustod, mae Chwarel Rosehill bellach yn mwynhau bywyd newydd fel noddfa dawel lle gall bywyd gwyllt gysgodi a phobl ddianc o brysurdeb a helbul bywyd y ddinas.

Ers y 1980au, mae gwaith arloesol gan Grwp Cymunedol Chwarel Rosehill wedi trawsnewid y safle yn Barc Cymunedol cyntaf Abertawe, gan wella mynediad i bawb a hybu datblygiad cymuned gyfoethog o blanhigion ac anifeiliaid. Nawr ceir sawl pwll yno, nant a rhaeadr a llawer o fursennod a gweision y neidr. Un o'r pethau arbennig yn Chwarel Rosehill yw'r rhedynen gyfrdwy.

Mae'r parc yn cynnwys lle glaswelltog mawr lle gall pobl gyfarfod, chwarae, cerdded cŵn, eistedd wrth fyrddau picnic neu chwarae tenis bwrdd, a mwynhau golygfeydd o Fae Abertawe a'r Mwmbwls. Ychydig uwchben hyn mae labyrinth Creta anarferol, wedi'i ddylunio a'i dorri allan gan wirfoddolwyr ac yn cael ei gynnal yn flynyddol gyda chregyn cocos ffres.

Gwirfoddoli

Mae Grŵp gwirfoddolwyr lleol Chwarel Rosehill yn cyfarfod bob dydd Mawrth a dydd Sul cyntaf pob mis (yn dibynnu ar y tywydd). Mae eu gwaith yn cynnwys plannu blodau, bylbiau a choed bach, gofalu am welyau blodau a choed, cynnal a chadw llwybrau a'r labyrinth, cynaeafu coesynnau helyg (ar gyfer prosiectau gwehyddu yn y dyfodol) a mwy.

Mae croeso mawr i wirfoddolwyr newydd a gall pobl ymuno ar sail ad hoc. Gellir darparu offer a menig, a mwynheir coffi, te a rhywbeth melys ar ddiwedd y sesiynau.

Dynodiadau

Safle o Bwysigrwydd Cadwraeth Natur (SBCN)

Cyfleusterau

Does dim parcio ffurfiol ynghlwm wrth y safle

Gwybodaeth am fynediad

Cyfeirnod Grid SS643941
Map Explorer yr Arolwg Ordnans 164 Gŵyr ac 165 Abertawe

Hillside
Gallwch fynd i'r safle hir hwn o sawl cyfeiriad: h.y. oddi ar Heol Pantycelyn ger Prifysgol Fetropolitan Abertawe; oddi ar Gilgant Pen-lan; oddi ar Heol Teras; o Deras Fairfield; Nicander Parade; pen Stryd Hewson; Heol North Hill; Baptist Well Place; High View; Heol Granogwen.

Parc Cymunedol Chwarel Rosehill
Gellir cyrraedd Parc Cymunedol Chwarel Rosehill o Rose Hill Road, Cilgant Penlan a Ffordd y Teras, Ffordd Pantycelyn a Theras Fairfield.

Cael cyfeiriadau Gweld ar Google Maps