Y diweddaraf am Fusnes Twristiaeth - 8 Rhag 2025

Mae'r cynnig bysus am ddim yn ôl y penwythnos hwn ar gyfer y Nadolig

Gall y rheini sy'n mynd i ganol dinas Abertawe i siopa deithio am ddim ar y penwythnosau cyn y Nadolig.

Nawr bod y streic gan staff bysus First Cymru wedi'i gohirio, gallwch arbed arian wrth ymweld ag unrhyw le yn Abertawe ar yr amod bod eich taith yn dechrau ac yn gorffen yn y ddinas.

Dyma'r rhestr lawn o ddyddiadau:

• 13 a 14 Rhagfyr
• 20 a 21 Rhagfyr
• Dydd Llun 22 Rhagfyr, dydd Mawrth 23 Rhagfyr a Noswyl Nadolig
• 27 a 28 Rhagfyr
• Dydd Llun 29 Rhagfyr, dydd Mawrth 30 Rhagfyr a Nos Galan

Meddai Arweinydd Cyngor Abertawe, Rob Stewart, "Gall y Nadolig fod yn gyfnod drud ac rydym yn gobeithio y bydd pawb yn manteisio ar y cynnig gwych hwn.

Gwasanaeth Bws Siopa am ddim newydd sbon yn rhoi hwb i ganol y ddinas

Mae gwasanaeth bysus newydd sbon ar gyfer siopwyr sydd am deithio o gwmpas canol dinas Abertawe yn lansio yr wythnos nesaf.

Enw'r gwasanaeth yw'r Bws Siopa ac mae'n cynnig bws gwennol sy'n cysylltu'r orsaf drenau yn y gogledd â'r orsaf fysus yn y de gan stopio ym Marchnad Abertawe ar y ffordd.

Mae'r gwasanaeth ar gael ddydd Llun i ddydd Gwener, 9.00am i 4.30pm, ac fe ddyluniwyd i'w wneud yn haws nag erioed i siopwyr deithio o amgylch canol y ddinas.

Mae'r Bws Siopa hygyrch yn fws mini â 15 o seddi sy'n cysylltu'r tri lleoliad â man gollwng y farchnad wrth fynedfa Whitewalls.

Mae'n golygu y gall ymwelwyr â chanol y ddinas deithio am ddim yn ôl i'r orsaf fysus neu'r orsaf drenau fel y gallant barhau â'u taith yn haws nag o'r blaen. Bydd hefyd yn darparu mynediad uniongyrchol â chanol y ddinas i ymwelwyr wrth iddynt gyrraedd Abertawe ar fws neu drên.

Gwybodaeth: www.abertawe.gov.uk/bwssiopa

Ar agor! Y Storfa, hwb gwasanaethau cyhoeddus newydd yng nghanol dinas Abertawe

Mae'r hwb gwasanaethau cymunedol blaenllaw hwn, a gyflwynir i chi gan Gyngor Abertawe, yn hen adeilad BHS ar Stryd Rhydychen.

Y Storfa yw conglfaen rhaglen adfywio gwerth £1bn y cyngor, a bydd yn helpu i gynyddu nifer y bobl sy'n ymweld â chanol y ddinas. 

Bwriedir i'r hwb drawsnewid sut mae preswylwyr yn cael mynediad at wasanaethau hanfodol yng nghanol y ddinas.

Mae'r Storfa'n dod ag amrywiaeth eang o wasanaethau ynghyd o dan yr unto, gan greu amgylchedd modern a chroesawgar.

Mae'n agos i gannoedd o leoedd parcio ceir - gan gynnwys cilfachau i'r rheini â phroblemau symudedd, ac i lwybrau ac arosfannau cludiant cyhoeddus. 

Roedd llawer o'r gwasanaethau sy'n cael eu cynnig yno ar gael ar y diwrnod cyntaf; caiff eraill eu hychwanegu wrth i staff ac ymwelwyr ymgyfarwyddo â threfnau arferol newydd.

Y Storfa

Cyhoeddi pecyn cymorth ardrethi busnes gwerth £116 miliwn

Bydd cynllun rhyddhad trosiannol newydd yn helpu busnesau i reoli newidiadau ardrethi o fis Ebrill nesaf.

Mae Llywodraeth Cymru wedi cyhoeddi £116 miliwn ychwanegol o gymorth, gan y bydd cyfraddau busnes yng Nghymru yn cael eu diweddaru i adlewyrchu gwerthoedd eiddo cyfredol.

O'r 1 Ebrill 2026, bydd yr ailbrisio yn golygu y bydd llawer yn gweld eu biliau yn gostwng, tra bydd eraill yn eu gweld yn codi.

Bydd unrhyw fusnes y mae ei bil yn cynyddu mwy na £300 y flwyddyn nesaf oherwydd yr ailbrisio yn cael y cynnydd yn raddol dros ddwy flynedd, yn hytrach na thalu'r cynnydd llawn ar unwaith.

Am y tro cyntaf ers 2010, bydd y lluosydd yn cael ei leihau ar gyfer pawb sy'n talu ardrethi. Bydd siopau manwerthu bach a chanolig yn elwa o gyfradd is newydd, gan dorri eu biliau tua £20 miliwn.

Mae Llywodraeth Cymru eisoes yn darparu £250 miliwn bob blwyddyn mewn rhyddhad ardrethi busnes parhaol. Mae tua dwy ran o dair o'r holl eiddo yng Nghymru naill ai ddim yn talu unrhyw ardrethi neu'n derbyn rhyw fath o ryddhad.

Am ragor o wybodaeth cliciwch ar y ddolen hon: Datganiad Ysgrifenedig: Cymorth ardrethi annomestig ar gyfer 2026-27 (3 Rhagfyr 2025) | LLYW.CYMRU ac Ardrethi Busnes yng Nghymru | Busnes Cymru.

Cyfleoedd i ymuno â ni a noddi categorïau yng Ngwobrau Chwaraeon Abertawe

Mae Cyngor Abertawe'n falch o gyhoeddi Gwobrau Chwaraeon Abertawe sydd ar ddod, sef dathliad uchel ei fri o ragoriaeth chwaraeon ledled ein dinas a'n rhanbarth. Mae'r digwyddiad blynyddol hwn yn tynnu sylw at athletwyr, hyfforddwyr, gwirfoddolwyr a chlybiau sy'n gwneud cyfraniad eithriadol at chwaraeon yn Abertawe.

Y dyddiad cau ar gyfer cyflwyno enwebiadau yw 6 Ionawr 2026, a chynhelir seremoni ar 2 Ebrill 2026 yn Neuadd Brangwyn.

Rydym yn gwahodd busnesau lleol i ymuno â ni drwy noddi categorïau. Mae noddi'n cynnig cyfle unigryw i wneud y canlynol:

• Tynnu sylw cynulleidfa eang o athletwyr at eich brand.
• Dangos bod eich busnes yn cefnogi gwerthoedd gwaith tîm, cyflawni a balchder cymunedol.
• Sicrhau amlygrwydd drwy gyhoeddusrwydd y digwyddiad, deunydd hyrwyddo ar y cyfryngau cymdeithasol a chydnabyddiaeth ar y llwyfan.
• Cefnogi chwaraeon lleol a'n helpu i ddathlu'r bobl sy'n ysbrydoli Abertawe.

Y categorïau noddi sydd ar gael yw:

• Gwobr Person Ifanc Ysbrydoledig y Flwyddyn
• Gwobr Chwaraewr y Flwyddyn
• Gwobr Hyfforddwr Cymunedol y Flwyddyn
• Gwobr Chwaraewr ag Anabledd y Flwyddyn
• Gwobr Clwb neu Dîm Hŷn y Flwyddyn
• Gwobr Chwaraewr Iau y Flwyddyn
• Gwobr Chwaraewraig Iau y Flwyddyn
• Gwobr Annog Abertawe Actif

Am ragor o wybodaeth, mae croeso i chi e-bostio zena.laws@abertawe.go.uk neu ffonio 07813 579290.

Rhagor o wybodaeth am Wobrau Chwaraeon Abertawe

Atal llithro, baglu a syrthio wrth iddi nosi'n gynt

Gall nosweithiau tywyllach a thywydd oerach gynyddu'r risg o lithro, baglu a syrthio yn y gweithle. Mae gan fusnes ddyletswydd gyfreithiol i sicrhau iechyd a diogelwch ei staff, gwirfoddolwyr, contractwyr a defnyddwyr.

Mae llithro a baglu yn achosi dros draean o'r holl anafiadau mawr a gallant hefyd arwain at fathau eraill o ddamweiniau, fel syrthio o uchder neu i mewn i beiriannau.

Ar yr adeg hon o'r flwyddyn gall arwynebau fod yn beryglus, sy'n golygu y gall damweiniau llithro a baglu ddigwydd yn fwy aml. Mae yna ddigon o ffactorau tymhorol i'w hystyried wrth osgoi'r mathau hyn o ddamweiniau gan gynnwys:

• diffyg goleuadau
• gormod o ddŵr o ganlyniad i law
• dail gwlyb a rhai sy'n pydru

Mae canllawiau'r Awdurdod Gweithredol Iechyd a Diogelwch yn eich helpu i ddeall beth sy'n achosi llithro a baglu a sut i'w hatal ac mae eu tudalennau gwe llithro a baglu hefyd yn rhoi digon o wybodaeth ac adnoddau pellach, gan gynnwys cyngor ar beth i'w wneud nesaf os oes damwain llithro neu faglu yn y gwaith.

Grantiau newydd i helpu pobl i ddod yn hyderus wrth ddefnyddio technoleg Ddigidol

Bydd Grant Cynhwysiant Digidol Cymru newydd Llywodraeth Cymru yn cefnogi prosiectau sy'n helpu pobl i oresgyn rhwystrau i ddefnyddio technoleg ddigidol drwy wella sgiliau digidol sylfaenol, magu hyder, a sicrhau bod ganddynt yr offer a'r gefnogaeth sydd eu hangen ar lefel leol.

Mae'r grant wedi ei groesawu gan sefydliadau sy'n cefnogi pobl sy'n aml wedi'u heithrio o'r byd Digidol.

Mae'r grantiau'n agored i bob sector, gan gynnwys grwpiau cymunedol, mentrau cymdeithasol, sefydliadau'r trydydd sector, grwpiau ffydd, a chyrff cyhoeddus a phreifat. Mae dau fath o gyllid ar gael:

• Mae'r Grant Craidd yn cefnogi prosiectau hirdymor yn seiliedig ar anghenion lleol am hyd at dair blynedd, gan helpu sefydliadau i wneud cynhwysiant digidol yn rhan o fywyd bob dydd. Bydd tua £390,000 ar gael bob blwyddyn, gyda dyfarniadau arferol o tua £43,500.
   
• Mae'r Grant Arloesedd yn ariannu prosiectau tymor byr sy'n profi dulliau newydd a chreadigol o helpu pobl i ddefnyddio technoleg ddigidol, gyda £60,000 ar gael a dyfarniadau nodweddiadol o tua £15,000.

Mae'r grant yn adeiladu ar yr hyn y mae Llywodraeth Cymru wedi'i ddysgu drwy raglenni cynhwysiant digidol Cymru gyfan blaenorol a'r gwaith blaenllaw ar isafswm safon byw digidol.

Cafodd yr ymgynghoriad ei gynnal rhwng 17 Tachwedd 2025 a 09 Chwefror 2026. Mae canllawiau llawn a manylion cais ar gael yma: Grantiau newydd i helpu pobl i ddod yn hyderus wrth ddefnyddio technoleg ddigidol | LLYW.CYMRU ac Gwneud cais am Grant Cynhwysiant Digidol Cymru | LLYW.CYMRU.

Cymeradwyo Cynllun Trafnidiaeth Rhanbarthol De-orllewin Cymru

Bydd preswylwyr a busnesau ar draws Sir Gaerfyrddin, Castell-nedd Port Talbot, Sir Benfro ac Abertawe'n elwa o welliannau sylweddol i rwydwaith trafnidiaeth y rhanbarth yn dilyn penderfyniad Llywodraeth Cymru i gymeradwyo Cynllun Trafnidiaeth Rhanbarthol De-orllewin Cymru.

Nod y cynllun, a fydd yn llywio buddsoddiad a datblygiad mewn trafnidiaeth hyd at 2030, yw ei gwneud yn haws, yn wyrddach ac yn fwy fforddiadwy i bobl deithio ar draws y rhanbarth.

Mae'n nodi sut y bydd trafnidiaeth gyhoeddus, llwybrau cerdded a beicio a rhwydweithiau ffyrdd yn cael eu gwella i gysylltu cymunedau'n well, cefnogi economïau lleol a chreu dyfodol mwy cynaliadwy ar gyfer de-orllewin Cymru.

Mae'r cynllun wedi'i ddatblygu gan Gyd-bwyllgor Corfforedig De-orllewin Cymru, sy'n dwyn ynghyd y pedwar awdurdod lleol ac awdurdodau parciau cenedlaethol yn y rhanbarth. 

Mae'n dilyn proses ymgynghori helaeth lle rhannodd bron 900 o breswylwyr, busnesau a sefydliadau cymunedol eu barn ar y cynllun drafft.

Helpodd yr adborth i lunio'r cynllun terfynol, sydd bellach wedi'i gymeradwyo'n ffurfiol gan Lywodraeth Cymru.

Bydd y cam nesaf yn cynnwys gwaith manwl i addasu'r rhestr derfynol o gynlluniau a fydd yn derbyn cyllid a dechrau ar y gwaith cyflwyno. Bydd y cynlluniau hyn yn cael eu cyhoeddi cyn gynted ag y byddant yn cael eu cadarnhau.

Cymeradwyo Cynllun Trafnidiaeth Rhanbarthol De-orllewin Cymru

Hyrwyddwch eich busnes twristiaeth neu letygarwch am ddim ar wefan croesobaeabertawe.com

Ydych chi'n fusnes twristiaeth neu letygarwch yn Ninas a Sir Abertawe?

Os felly, gallech fod yn gymwys i gael eich cynnwys ar wefan swyddogol y cyrchfan, croesobaeabertawe.com, am ddim. 

Mae'r wefan, a gynhelir gan Dîm Twristiaeth Cyngor Abertawe, yn cael ei defnyddio ar gyfer ymgyrchoedd drwy gydol y flwyddyn er mwyn denu ymwelwyr newydd ac ymwelwyr dychwel i'r ardal. 

Gall gweithredwyr llety lleol, atyniadau, darparwyr gweithgareddau a busnesau bwyd a diod sydd am ddod yn bartneriaid Croeso Bae Abertawe a manteisio ar amrywiaeth o fuddion restru eu busnes am ddim.

Gallwch gael rhagor o wybodaeth drwy e-bostio Tim.Twristiaeth@abertawe.gov.uk neu cofrestrwch eich busnes yma.

Oedd y diweddariad hwn ar y fasnach dwristiaeth yn ddefnyddiol? Rhannwch ef neu cysylltwch â Geraldine.Williams@abertawe.gov.uk