Rwyf wedi derbyn gorchymyn dyled ar gyfer Treth y Cyngor

Cais am wybodaeth

Mae'r gorchymyn dyled, ymhlith pethau eraill, yn rhoi'r pŵer i ni gael gwybodaeth ariannol amdanoch chi. Bydd yr wybodaeth hon yn ein galluogi i benderfynu pa gamau gweithredu y dylid eu cymryd i orfodi talu'r ddyled sy'n ddyledus.

Pan roddir gorchymyn dyled gan y llys ynadon, byddwn yn anfon cais am wybodaeth atoch. Mae gennych 14 diwrnod o'r dyddiad y byddwch yn derbyn y cais hwn am wybodaeth i'w gwblhau a'i ddychwelyd atom gyda threfniant talu addas cyn y cymerir camau adfer.

Gall methu â dychwelyd y cais am wybodaeth olygu eich bod yn agored i ddirwy o hyd at £500. Os ydych yn darparu gwybodaeth ffug, gallwch wynebu dirwy o hyd at £1,000.

Camau gweithredu y gallwn eu cymryd i adennill y ddyled

1. Didynnu arian o'ch enillion

Pan fyddwn wedi derbyn gorchymyn dyled, gallwn ddweud wrth eich cyflogwyr i ddidynnu symiau'n uniongyrchol o'ch cyflog a'i dalu'n uniongyrchol i ni. Gelwir hyn yn orchymyn atafaelu enillion.

Bydd y swm yn ganran benodol o'r enillion sydd gennych yn weddill ar ôl gwneud didyniadau eraill fel treth incwm. Mae gan eich cyflogwr hawl i godi tâl o £1 am bob didyniad i dalu'r costau gweinyddol.

Arweiniad ar gyfer cyflogwyr sydd wedi derbyn Gorchymyn Atafaelu Enillion ar gyfer gweithiwr: Gorchmynion Atafaelu Enillion y Dreth Gyngor - canllawiau i gyflogwyr (Word doc, 149 KB)

2. Didynnu arian o'ch budd-daliadau

Pan fyddwn wedi derbyn gorchymyn dyled ac rydych yn derbyn Credyd Cynhwysol/Cymhorthdal Incwm/Lwfans Ceisio Gwaith/Lwfans Cyflogaeth a Chymorth neu Gredyd Pensiwn, gallwn ofyn i'r Adran Gwaith a Phensiynau gymryd arian o'ch budd-dal i'n talu'n uniongyrchol. Nodir y swm priodol gan statud. Gellir ond gwneud y didyniad hwn os oes lefel ddigonol o fudd-dal. 

3. Defnyddio asiant gorfodi

Pan fyddwn wedi cael gorchymyn atebolrwydd, gallwn drosglwyddo'ch dyled i asiant gorfodi (beili) a all ddod i'ch cartref ac atafaelu nwyddau sydd gyfwerth â gwerth y ddyled a'u gwerthu i dalu'r swm sy'n ddyledus. Os cymerir y camau hyn, mae gan yr asiant gorfodi hawl i godi ffioedd ychwanegol ar eich traul chi.

Os caiff eich dyled ei throsglwyddo i asiant gorfodi, bydd y strwythur ffioedd isod yn berthnasol:

Ffïoedd asiant gorfodi (Rheoliadau Meddiannu Nwyddau (Ffïoedd) 2014)

1. Cam y ffi: cydymffurfio 
   • Cyn gynted ag y bydd eich cyfrif wedi'i dderbyn gan yr asiant gorfodi, ychwanegir y ffi hon at eich dyled
   • Ffi benodol: £75
   • Ffioedd canrannol (ffi ychwanegol os yw'r ddyled yn fwy na £1,500): 0%
2. Cam y ffi: gorfodi
   • Cyn gynted ag y bydd yr asiant gorfodi'n cyrraedd eich mangre, ychwanegir y ffi hon at eich dyled
   • Ffi benodol: £235
   • Ffioedd canrannol (ffi ychwanegol os yw'r ddyled yn fwy na £1,500): 7.5%
3. Cam y ffi: arwerthiant
   • Cyn gynted ag y bydd nwyddau'n cael eu symud i rywle i'w gwerthu, ychwanegir y ffi hon at eich dyled
   • Ffi benodol: £110
   • Ffioedd canrannol (ffi ychwanegol os yw'r ddyled yn fwy na £1,500): 7.5%

Unwaith y bydd yr asiant gorfodi wedi cael cyfarwyddyd, bydd yn rhaid i chi ymdrin yn uniongyrchol â nhw. Ni fyddwn yn ymyrryd nac yn rhan o'r broses eto am y cyfnod hwnnw o ddyled Treth y Cyngor.

Mwy o wybodaeth am asiantau gorfodi Mae beili neu asiant gorfodi wedi cysylltu â mi ynghylch Treth y Cyngor

4. Gwneud cais am orchymyn arwystlo

Pan fyddwn wedi cael gorchymyn dyled ac nad ydych wedi talu'ch Treth y Cyngor yn llawn, mewn rhai amgylchiadau, gallwn wneud cais i'r Llys Sirol am orchymyn arwystlo. Mae hyn yn gosod tâl gwarantedig ar eiddo, sydd weithiau'n arwain at werthiant gorfodol eich eiddo i dalu'r ddyled sy'n ddyledus. Byddwch hefyd yn atebol am y ffioedd cyfreithiol ac alldaliadau a godir yn y broses hon.

5. Dechrau achos methdaliad / diddymiad

Os byddwn yn derbyn gorchymyn dyled ac nid ydych wedi talu'ch Treth y Cyngor yn llawn, mewn rhai amgylchiadau, gallwn ddechrau achos methdaliad yn eich erbyn. 

Bydd y weithred hon yn codi costau ychwanegol y byddwch chi'n atebol amdanynt.