Canllawiau gyrwyr a cherbydau ar gyfer Cerbydau Hacni a Cherbydau Hurio Preifat

1. Gwnaed yr amodau hyn yn unol ag Adran 48 o Ddeddf Llywodraeth Leol (Darpariaethau Amrywiol) 1976. Gall torri un neu ragor o'r Amodau hyn arwain at atal, dirymu neu wrthod adnewyddu'r drwydded yn unol ag Adran 60 o'r Ddeddf honno a/neu erlyniad pe bai trosedd o dan gyfraith Trwyddedu Tacsi.

2. Yn y drwydded hon:

Mae gan"swyddog awdurdodedig"yr un ystyr ag yn Adran 80 o Ddeddf Llywodraeth Leol (Darpariaethau Amrywiol) 1976.
Mae "y Cyngor"yn golygu Dinas a Sir Abertawe.
Ystyr"Cerbyd Hurio Preifat"yw cerbyd sydd wedi'i drwyddedu gan y Cyngor ar hyn o bryd o dan Adran 48 o'r Ddeddf
Ystyr "plât adnabod" yw'r plât a roddir gan y Cyngor at ddibenion adnabod y cerbyd fel Cerbyd Hurio Preifat.
Mae gan"y Perchennog"yr un ystyr ag yn Adran 80 o Ddeddf Llywodraeth Leol (Darpariaethau Amrywiol) 1976.
Mae gan"mesurydd tacsi"yr un ystyr ag yn Adran 80 o Ddeddf Llywodraeth Leol (Darpariaethau Amrywiol) 1976.

Cyffredinol

3. Dim ond ar gyfer Teithiau Hurio Preifat cyfreithlon wedi'u trefnu ymlaen llaw gyda gweithredwr trwyddedig y gellir defnyddio'r cerbyd.

4. Rhaid i bob cerbyd gael ei gyflwyno i'w archwilio pryd bynnag a ble bynnag y bydd swyddog awdurdodedig yn gofyn am hynny, ac mae'n rhaid iddo gydymffurfio gyda'r holl ofynion statudol cyfredol ar gyfer cerbydau ffyrdd a'r amodau a osodir gan y Cyngor. Os bydd cerbydau'n methu â mynychu ar yr amser penodedig, gall y Cyngor atal eu trwydded nes bod y cerbyd wedi'i brofi a'i ganfod yn addas ar gyfer y ffordd. Ni fydd unrhyw gerbyd sy'n methu'r prawf yn cael ei ddefnyddio i gludo teithwyr ar sail hurio na thâl nes bod y cerbyd wedi cael ei ail-brofi a'i ganfod yn addas i'r ffordd.

5. Ni dderbynnir cerbydau i'w trwyddedu ar yr achlysur cyntaf ar ôl 5 mlynedd o ddyddiad y cofrestriad cyntaf. Bydd cerbydau'n cael eu hail-drwyddedu ar sail teilyngdod.

6. Bydd trwydded pob cerbyd yn weithredol am flwyddyn, a'r dyddiad terfyn fydd diwrnod olaf y mis cyn cyhoeddi'r drwydded.

7. Ni roddir unrhyw drwydded nes bydd y ffi briodol wedi'i thalu. Pan wneir taliad gyda siec nad yw'n cael ei anrhydeddu, bydd y drwydded a roddir yn ddi-rym.

8. a) Rhaid i ddeiliad y drwydded gyflwyno'r ddogfen gofrestru (V5c) ar adeg rhoi'r drwydded neu mewn achosion lle mae'r cerbyd wedi'i addasu. Mae'n rhaid i ddeiliad y drwydded gyflwyno tystysgrif yswiriant ddilys a gyhoeddwyd o dan Ddeddf Traffig Ffyrdd 1988 a thystysgrif M.O.T ddilys ar adeg talu'r ffi briodol. Rhaid i ddeiliad y drwydded gyflwyno'r cerbyd ar gyfer archwiliad swyddogol yn y ganolfan ddynodedig.

   b) Pan fo cerbyd yn cael ei addasu mewn rhyw ffordd, rhaid i'r Awdurdod Trwyddedu fod yn fodlon bod safon y gwaith a wneir yn bodloni'r ddeddfwriaeth a'r safonau diogelwch cyfredol. Rhaid i berchnogion gyflwyno un o'r dogfennau gwreiddiol canlynol cyn cyhoeddi trwydded:

i) Cymeradwyaeth Math Cerbyd Cyfan AC (NEWTON)
ii) Cymeradwyaeth Math Cyfresi Bach Cenedlaethol (NYSSA)
iii) Tystysgrif Cydymffurfiaeth (CIC)
iv) Cymeradwyaeth Cerbyd Unigol (I VA)
v) Cymeradwyaeth Cerbyd Sengl (S VA).

Noder Os nad yw'r tystysgrifau uchod ar gael oherwydd yr addasiadau sy'n cael eu gwneud ar ôl gwerthu'r cerbyd, bydd yn ofynnol i berchnogion ymgymryd â Chymeradwyaeth Cerbyd Sengl Safonol Gwirfoddol gydag Arolygydd VOA

Manyleb cerbydau a chynnal a chadw

9. Rhaid i bob cerbyd fod yn WYN.

10. Rhaid i bob cerbyd fod yn gerbyd gyriant llaw dde gyda dau ddrws bob ochr i'r cerbyd. Rhaid i bob teithiwr gael mynediad at ddrws y gellir ei agor o du mewn i'r cerbyd.

11. Bydd y nifer uchaf a ganiateir o deithwyr yn cael ei benderfynu ar ôl i'r Cyngor archwilio'r cerbyd.

12. Ni chaiff y perchennog ar unrhyw adeg ganiatáu i nifer y teithwyr a gludir fod yn fwy na'r nifer o deithwyr y mae'r cerbyd wedi'i drwyddedu ar eu cyfer.

13. Rhaid i bob cerbyd fod wedi'i adeiladu, ei gynnal a'i gadw fel ei fod yn ddiogel ac yn gyfforddus, ac mae'n rhaid i'r drysau allu agor yn ddigon llydan i sicrhau bod modd i deithwyr fynd i mewn i'r cerbyd ac allan ohono'n rhwydd.

14. i) Pan ddarperir olwyn sbâr mewn cerbyd, gan gynnwys olwyn dros dro i arbed lle, bydd y perchennog yn sicrhau bod yr olwyn sbâr yn cydymffurfio gyda gofynion cyfreithiol cyfredol (gan dalu sylw penodol i ddyfnder y gwadn) a bod offer newid olwyn gan gynnwys jac a cham troi olwynion yn cael ei gario bob amser.
    ii)

a) Mae olwynion sbâr 'Run Flat' a/neu olwynion arbed lle yn dderbyniol ar gerbydau trwyddedig os ydynt yn cydymffurfio â Manyleb y Gwneuthurwyr Gwreiddiol. Os bydd pynctiar yn digwydd, bydd perchnogion a gyrwyr yn ceisio gwneud trefniadau amgen ar gyfer parhau â thaith y teithiwr

b) Os defnyddir olwyn sbâr 'Run Flat' a neu olwyn sbâr sy'n arbed lle ar gerbyd er mwyn cwblhau taith, dylid ei ddefnyddio wrth gwblhau'r daith bresennol yn unig ac i
ddychwelyd i fodurdy i gael olwyn newydd addas a'i ddefnyddio'n unol â chanllawiau'r gwneuthurwr. Ni ellir cwblhau teithiau pellach tra bod olwyn 'Run Flat' neu olwyn arbed lle yn cael ei ddefnyddio ar y cerbyd

    iii) Pecynnau Atgyweirio Dros Dro:

a) bydd cerbydau a gymeradwywyd i'w trwyddedu sy'n defnyddio pecyn atgyweirio dros dro yn hytrach nag olwyn sbâr yn cadw pecyn atgyweirio bob amser i'w ddefnyddio'n unol â chanllawiau'r gwneuthurwr. Pan fydd y pecyn atgyweirio dros dro yn cael ei ddefnyddio, bydd yn cael ei ddisodli ar unwaith gan becyn atgyweirio dros dro newydd.

b) os bydd pynctiar yn digwydd, bydd perchnogion a gyrwyr yn ceisio gwneud trefniadau amgen ar gyfer parhau â thaith y teithiwr cyn defnyddio'r pecyn atgyweirio dros dro;

c) bydd cerbydau sy'n defnyddio pecyn atgyweirio dros dro er mwyn cwblhau taith a huriwyd yn defnyddio'r pecyn yn unol â chanllawiau'r gwneuthurwr, ac ni fydd yn defnyddio'r cerbyd ar gyfer taith arall wedi'i hurio nes bod yr olwyn neu'r teiar wedi cael ei newid;

d) bydd perchnogion cerbydau sy'n defnyddio pecyn atgyweirio dros dro yn cadw cofnod o'r dyddiad a'r amser y defnyddiwyd y pecyn atgyweirio ddiwethaf yn y cerbyd bob amser, ac yn derbyn a chadw tystiolaeth fod yr olwyn neu'r teiar wedi cael ei newid. Bydd gwybodaeth o'r fath ar gael yn rhwydd i Swyddogion ar gais.

15. Rhaid cael gwregys diogelwch ar y seddi blaen a chefn sy'n cydymffurfio ac wedi'u gosod yn unol â Safonau Prydeinig a gofynion cyfreithiol cyfredol. Bydd clustog hybu neu sedd plentyn yn cael ei ddarparu i blant ar gais.

16. Rhaid i du mewn pob cerbyd fodloni'r mesuriadau canlynol o leiaf:

Uchder

Rhaid i'r mesuriad rhwng brig clustogau'r sedd (heb eu gwasgu) hyd at ran isaf y to fod o leiaf 810mm.

Gofod pen-glin

Rhaid i'r mesuriad rhwng cefn y seddi blaen a chlustogau'r sedd gefn fod o leiaf 700mm. Lle bo modd addasu'r seddi blaen, mae'n rhaid gwneud y mesuriad yn y safle canolig

Seddi (lled)

Rhaid i led y sedd gefn o'r glustog i'r ymyl flaen fod o leiaf 407mm.

Sedd gefn (hyd)

Rhaid i hyd y sedd gefn a fesurir mewn llinell syth ar ei hyd ar flaen y sedd fod o leiaf 1220mm.

17. Mae'n rhaid i bob cerbyd gario diffoddydd tân 1kg addas, wedi'i farcio'n barhaol gyda rhif plât y cerbyd, yn hawdd ei weld ar gyfer defnydd brys ac yn cael ei gynnal a'i gadw'n flynyddol yn unol â Safonau Prydeinig. Bydd angen cadarnhad ysgrifenedig o waith cynnal a chadw.

18. Rhaid tynnu unrhyw garpedi, gosodiadau neu ffitiadau yn ystod yr archwiliad ar gais unrhyw swyddog awdurdodedig neu archwilydd cerbydau. Bydd gwrthod cydymffurfio ag unrhyw gais rhesymol gan swyddog o'r fath yn arwain at y cerbyd yn methu'r archwiliad.

19. Rhaid cadw tu mewn a thu allan i'r cerbyd yn lân ac yn daclus a rhaid i'r cerbyd gynnwys lle i ddal nifer rhesymol o fagiau bob amser.

20. Os bydd mesurydd tacsi wedi'i osod ar gerbyd, rhaid iddo fod o ddyluniad cymeradwy, wedi'i selio a'i brofi'n briodol gan swyddog awdurdodedig a rhaid cadw pob mesurydd o'r fath mewn cyflwr da a chyflwr gweithio priodol.

21. Rhaid i'r perchennog gadw unrhyw offer radio a osodir yn y cerbyd mewn cyflwr da, ond ni fydd yn gosod y canlynol yn y cerbyd - a) offer radio dwy ffordd (gan gynnwys radio CB) heb hysbysu'r cwmni yswiriant ymlaen llaw a derbyn cadarnhad o'u cymeradwyaeth ar y dystysgrif yswiriant. b) unrhyw offer radio sy'n gallu sganio mwy nag un amledd.

22. Bydd ffenestri wedi'u tywyllu'n cydymffurfio gyda gofynion cyfreithiol y Rheoliadau Cerbydau Ffordd (Adeiladu a Defnydd) cyfredol.

Hysbysiadau

23. Ni chaiff unrhyw addasiadau neu newidiadau eu gwneud i fanyleb, dyluniad, cyflwr nac ymddangosiad y cerbyd heb gymeradwyaeth ymlaen llaw gan y Cyngor tra bod y drwydded yn weithredol.

24. Dylid hysbysu'r swyddfa Drwyddedu yn ysgrifenedig o fewn 72 awr am unrhyw ddifrod i gerbyd yn dilyn damwain, a sicrhau bod y cerbyd ar gael i'w archwilio.

Plât trwydded, sticeri trwydded ac arwyddion cymeradwy

25. Rhaid i blatiau a sticeri cerbydau gael eu gosod yn ddiogel ar y cerbyd. Mae'n rhaid gosod plât y cerbyd ar far taro neu gaead cist/drws cefn rhwng y llinell ganol ac ochr allanol y cerbyd. Rhaid gosod sticeri ar ddrysau blaen y cerbyd ar y ddwy ochr. Rhaid sicrhau bod y plât a'r sticeri yn weladwy bob amser. Rhaid dychwelyd plât y cerbyd i'r Cyngor ar ôl i'r drwydded ddod i ben.

26. Rhaid i bob cerbyd Hurio Preifat arddangos y canlynol:

Blaen y Cerbyd - Arwydd wedi'i oleuo yn mesur 37cm x 10cm i'w arddangos yng nghornel chwith uchaf y ffenestr flaen ac yn cynnwys y manylion canlynol: "Enw'r cwmni Rhif Ffôn Teithiau wedi'u harchebu ymlaen llaw yn unig"

Cefn y Cerbyd - Arwydd heb ei oleuo yn mesur 37cm x 10cm i'w arddangos yng nghornel chwith uchaf y ffenestr ôl ac yn cynnwys y manylion canlynol: "Enw'r cwmni Rhif Ffôn Teithiau wedi'u harchebu ymlaen llaw yn unig"

27. Rhaid i bob cerbyd hurio preifat ddangos arwyddion yn nodi enw a rhif ffôn y cwmni, ac mae'n rhaid i'r rhain gael eu gosod yn ddiogel ar y cerbyd wrth ymyl sticeri drws yn dangos rhif trwydded y cerbyd.

Trosglwyddo trwydded cerbyd

28. Ni chaniateir trosglwyddo na disodli unrhyw gerbyd ar gyfer y drwydded honno ac eithrio yn unol â'r weithdrefn gymeradwy.

29. Pan fo perchennog yn trosglwyddo ei fuddiant yn y cerbyd trwyddedig i berson heblaw'r perchennog a enwir ar y drwydded, bydd yn hysbysu'r Cyngor o fewn 14 diwrnod ar ôl y trosglwyddiad gan nodi'r enw a'r cyfeiriad y trosglwyddwyd y cerbyd iddo.

30. Caniateir gosod camera o fath teledu cylch cyfyng yn y cerbyd er mwyn diogelu'r gyrrwr a'r teithwyr. Rhaid i'r perchennog sicrhau bod defnydd o offer o'r fath yn cydymffurfio â holl ofynion y ddeddfwriaeth gyfredol. Os oes camera wedi'i osod, rhaid arddangos Hysbysiadau sy'n hysbysu teithwyr o'i ddefnydd y tu mewn i'r cerbyd.

Yswiriant

31. Bydd Perchennog y Cerbyd Hurio Preifat yn sicrhau bod Polisi Yswiriant yn cael ei gadw'n weithredol sy'n cydymffurfio ym mhob ffordd gyda deddfwriaeth Traffig Ffordd gyfredol, ac sy'n cwmpasu defnydd o'r cerbyd hwnnw i gludo teithwyr ar sail hurio a derbyn tâl.

32. Ar gais Swyddog awdurdodedig, bydd y Perchennog yn cyflwyno Tystysgrif Yswiriant mewn perthynas â'r cerbyd i'w archwilio gan y Swyddog. Os nad yw'r Perchennog yn cyflwyno tystysgrif o'r fath i'r Swyddog ar gais, rhaid i'r Perchennog ei chyflwyno i'r Swyddog neu i unrhyw Swyddog awdurdodedig yn y swyddfa drwyddedu o fewn pum niwrnod o gais o'r fath.

Hysbysebu

33. Ni chaiff unrhyw ffitiadau neu arwyddion, ac eithrio'r rhai a gymeradwywyd gan y Cyngor neu ei swyddogion awdurdodedig, eu hatodi tu mewn neu tu allan i'r cerbyd.

Canllawiau ar gyfer hysbysebu neu arddangos logo cwmni ar gerbydau Hurio Preifat

a. Rhaid i bob cais am hysbysebu neu i arddangos logo cwmni ar Gerbyd Hurio Preifat neu du mewn iddo gael eu cyflwyno'n ysgrifenedig at sylw Cyfarwyddwr yr Amgylchedd, ynghyd â sampl o'r deunydd hysbysebu arfaethedig.

b. Rhaid i ansawdd y ceisiadau fod o safon dderbyniol. Ni dderbynnir unrhyw ffacs. Rhaid darparu gwaith celf lliw ym mhob achos ac mae'n rhaid darparu manylion llawn y cynigion hysbysebu. (Noder - mae'n hanfodol bod holl fanylion yr hysbyseb arfaethedig yn cael eu dangos yn y cyflwyniad gwreiddiol. Os na wneir hynny, gallai'r hysbyseb gael ei wrthod).

c. Bydd y cais, os ystyrir yn dderbyniol, yn cael ei gymeradwyo dros dro.

d. Rhoddir Cymeradwyaeth Derfynol unwaith y bydd yr hysbyseb neu logo'r cwmni wedi'i osod ar y cerbyd. Rhaid gwneud apwyntiad gyda Swyddog Trwyddedu Tacsi ar gyfer arolygiad terfynol lle bydd y Swyddog yn cadarnhau bod y gwaith wedi'i gwblhau yn unol â'r gymeradwyaeth dros dro a roddwyd.

e. Bydd yn ofynnol i berchennog unrhyw gerbyd sy'n arddangos hysbyseb neu logo cwmni nad yw wedi derbyn ei archwiliad terfynol ei dynnu ar unwaith.

f. Bydd cerbydau sy'n arddangos hysbysebu neu logo cwmni heb gymeradwyaeth y Cyngor yn groes i'r amodau sydd ynghlwm wrth drwydded y cerbyd, a gallant gael eu hatal hyd nes y bydd y deunydd wedi'i dynnu o'r cerbyd.

g. Rhaid i bob hysbyseb gydymffurfio â Chodau Hysbysebu a Hyrwyddo Gwerthiant Prydain ac mae'n gyfrifoldeb i'r asiantaeth neu'r unigolyn sy'n ceisio cymeradwyaeth yr Awdurdod Trwyddedu i sicrhau eu bod yn gwneud hynny.

h. Bydd unrhyw hysbyseb a gymeradwywyd yn cael ei osod ar y drysau cefn yn unig, o dan y ffenestri.
Rhaid arddangos pob "arwydd adnabod" sy'n dangos manylion y cwmni (gweler y pwynt isod), ar ddrws blaen y cerbyd yn unig, o dan y ffenestr ac ni ddylai guddio'r arwydd sy'n dangos rhif trwydded y cerbyd. Gellir arddangos unrhyw logo cwmni, sy'n hysbysebu tacsi neu fusnes hurio preifat y Gweithredwr neu'r Perchennog ei hun, sydd wedi'i gymeradwyo yn unol ag amod 33 (d) uchod, ar y boned, ar gefn y cerbyd a/neu ar y drysau cefn yn unig.

i. Rhaid i ddeunyddiau a ddefnyddir ar gyfer hysbysebion neu logos cwmnïau fod o ansawdd nad yw'n hawdd eu difrodi neu eu datgysylltu. Ni ddylid defnyddio unrhyw ddeunyddiau papur na phast gludiog sy'n hydoddi mewn dŵr. Rhaid gosod hysbysebion yn uniongyrchol ar baneli drws cefn allanol y cerbyd neu eu hatodi i ddechrau i banel magnetig cymeradwy sydd wedyn ynghlwm wrth y cerbyd.

• Ni ddylid defnyddio deunydd sy'n adlewyrchu at ddibenion hysbysebu neu ddangos logos cwmni.
• Bydd pob cynnig yn cael ei ystyried ar ei rinweddau ond ni fydd yr hysbysebion na'r logos cwmnïau canlynol yn cael eu cymeradwyo
  • rhai sydd â thestunau gwleidyddol, hiliol, crefyddol, rhywiol neu ddadleuol;
  • y rhai ar gyfer asiantaethau hebrwng, sefydliadau hapchwarae neu barlyrau tylino:
  • rhai sy'n dangos ffigurau noethlymun neu led-noeth;
  • y rhai sy'n debygol o droseddu'r cyhoedd (yn darlunio trais, iaith anweddus neu anweddus)
  • rhai sy'n cyfeirio at alcohol, tybaco/sigaréts a chyffuriau;
  • rhai sy'n hyrwyddo prisiau gostyngol;
  • rhai sy'n hysbysebu swyddi;
  • rhai sy'n tynnu sylw oddi wrth uniondeb a/neu hunaniaeth y cerbyd;
  • rhai sy'n ceisio hysbysebu mwy nag un cwmni/gwasanaeth neu gynnyrch.
• Arwyddion adnabod - rhaid i arwyddion sy'n nodi enw a rhif ffôn y cwmni gael eu gosod yn ddiogel wrth ymyl sticeri'r drws sy'n dangos rhif trwydded y cerbyd a rhaid iddynt gael cymeradwyaeth dros dro a therfynol.

m. Caniateir hysbysebu neu arddangos logo cwmnïau o dan seddi sy'n plygu am i lawr ar yr amod bod unrhyw gais a dderbynnir yn cydymffurfio gyda'r canllawiau uchod.

n. Caniateir hysbysebu neu arddangos logo cwmnïau ar gefn clustogau'r pen ar yr amod bod unrhyw gais a dderbynnir yn cydymffurfio gyda'r canllawiau uchod.